ನೆನಪಿನಲ್ಲಿ

ಹಾಗೇ ಗೀಚಿದ ಹಾಳೆಗಳು
ಎಷ್ಟೋ ವರುಷದ ಹಿ೦ದೆ
ಈಗ ಸಿಕ್ಕಿದೆ ನನಗೆ
ನೆನಪಾಗಿ

ಕಾಲದಾ ಮರೆಯಲ್ಲಿ
ಕಾಣದೇ ಹೋದದ್ದು
ಮರೆ ಸರಿಯೆ ಕಾಡುತಿದೆ
ಬಹಳವಾಗಿ

ನೋಡಿದರೆ ಹಾಳೆಗಳು ತು೦ಬ
ಮಸುಕಾಗಿಹುದು
ಅಸ್ಪಷ್ಟ ಅಕ್ಷರಗಳೆ ಎಲ್ಲ ಅಲ್ಲಿ
ಆದರೂ ನೆನಪಿನಾತೀವ್ರತೆಯಲಿ
ಹೊಸ ಹೊತ್ತಗೆ ಪರಿಮಳ
ಸೂಸುತಿಹುದು

ಬೇರು

ಮೊದಲ ಮಾತದು ತೊದಲು
ಅದೆ ನಿತ್ಯ ಅಲ್ಲ
ಹಾಗೆ೦ದ ಮಾತ್ರಕ್ಕೆ ಸತ್ಯ
ಅಹುದಲ್ಲ


ಇ೦ದು ವಾಗ್ಮಿಯೆ ನೀನು
ಒಪ್ಪಿಕೊಳುವೆನು ನಾನು
ಹಾಗೆ೦ದು ಹಮ್ಮೇಕೆ
ಮೊದಲ ನುಡಿ ತೊದಲೆ


ಸಾಧನೆಯ ಬಲದಲ್ಲಿ
ಗಳಿಸಿರಬಹುದು ನೂರು
ಸಾಧನೆಯ ತೆರು ನಡೆ
ಮರೆಯದಿರು ಬೇರು

ಕನವರಿಕೆ

ಕವಿತೆ ಬರೆಯುವುದೇ  ಒಮ್ಮೊಮ್ಮೆ
ಅತಿಯಾದ ಹೆದರಿಕೆ
ಅಗಬಾರದದು ಒಳಗಿನ
ಸಿಟ್ಟು ಹತಾಷೆಗಳ ಕನವರಿಕೆ

ಪದ್ಯ ನೀಡಲಿ ಮುದವ
ಒ೦ದಲ್ಪ ಸುಖವ
ನನ್ನ ಒಳಗಿನ ಬೇಗೆ
ಸುಡದಿರಲಿ ಅವನೆದೆಯ

ದೀಪದಲ್ಲಿನ ಬತ್ತಿ ಎಷ್ಟು ಬೆ೦ದರು ಒಳಗೆ
ಕಾಣದಾರಿಗು ಅದರ ಒಡಲ ಉರಿಯು
ನೀಡೊ ಬೆಳಕಲಿ ಜಗಕೆ ಆಹ್ಲಾದ ತು೦ಬುವುದು
ಅರಿಯಬೇಕಿದೆ ಇ೦ದು ನಿಜದ ಒಲವು